Ibone 3. Hondarribiko triatloian

Urola-Plazaolako taldekideak Hondarribiko triatloian izan ziren asteburuan. Lasterketa honek esprint distantziako triatloian Gipuzkoako txapelak erabakitzeko balio izan zuen.

Euskal Triatloi zirkuituko 3. froga izan zen igandean ospaturikoa. Triatletek burutu beharreko distantzia 750m igerian, 20km bizikletan eta 5km korrika izan zen. Lehenengo atala, hondartzatik atera eta portu aldera prestaturiko zirkuituan osatzen zen. Ondoren, bizikleta hartu eta faroko igoera burutu ostean, Guadalupera igo ziren, ondoren Hondarribira bueltatzeko. Amaitzeko, Hondarribiko kaleetan zehar egin zituzten korrikako kilometroak.

Eguraldia aparta izan zen. Irteeran 500 parte hartzaile bildu ziren; horietatik 55 neska. Urola-Plazaola Triatloi taldekoak: Ainhoa Auzmendi, Aintxiñe Kerejeta, Ibone Sanchez, Jose Manuel Benitez, Iñaki Etxaniz, Juan Antonio Seño, Roberto Renilla eta Daniel Heras.

Lasterketako garailea Nicholas Kastelein Australiarra izan zen gizonezkoetan, 1:03:16ko markarekin. Emakumezkoetan berriz, Ane Ziaran izan zen 1:17:24ko markarekin.

Taldekideei dagokienez, neskak izan ziren protagonista. Ibone 2. atera zen uretatik eta bizikleta uztera 7. postuan iritsi bazen ere, korrikako saio bikain bati esker 3. postuan helmugaratu zen, 1:17:35ko denborarekin (bigarren postutik segundo bakarrera eta lehenengo postutik 10 segundotara). Aintxiñek 25. amaitu zuen eta Ainhoak 29. Horri esker, neskek taldekako 3. postua eskuratu zuten. Gipuzkoako txapelketari dagokionez, Ibone 2. sailkatu zen eta baita nesken taldea ere.

Mutilen kasuan, hauek izan ziren taldekideen sailkapenak: Benitez 84. (1:13:21), Renilla 147. (1:18:06), Etxaniz 163. (1:19:46), Seño bizikletan galduta ibili arren 192. iritsi zen (1:21:44) eta Heras 207. (1:22:59). Gipuzkoako txapelketari dagokionez, Benitez 5. sailkatu zen beterano I mailan.

Utzi erantzuna

Zure e-posta helbidea ez da argitaratuko.

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.